Stjórn
Stjórn Auðar Capital skipa:
Halla Tómasdóttir, stjórnarformaður
Guðbjörg Edda Eggertsdóttir
Vilhjálmur Þorsteinsson
David Adams
Kristín Edwald
Varamenn eru:
Hallgrímur Snorrason
Ragnheiður Jónsdóttir
Guðrún Pétursdóttir
Gunnar Þór Pétursson
Ingunn Wernersdóttir
Stjórn og varastjórn Auðar Capital, frá vinstri: Kristín Pétursdóttir forstjóri, David Adams, Halla Tómasdóttir stjórnarformaður, Guðbjörg Edda Eggertsdóttir, Kristín Edwald og Hallgrímur Snorrason, Neðri röð: varamennirnir Vihjálmur Þorsteinsson, Ingunn Wernersdóttir, Gunnar Þór Pétursson og Ragnheiður Jónsdóttir. Á myndina vantar Guðrúnu Pétursdóttur.
Aðalmenn í stjórn Auðar Capital
Halla Tómasdóttir er stjórnarformaður Auðar Capital. Halla var áður framkvæmdastjóri Viðskiptaráðs Íslands og starfaði í sex ár hjá Háskólanum í Reykjavík þar sem hún var lykilþátttakandi í uppbyggingu skólans. Hún stofnaði og stýrði Stjórnendaskóla HR og AUÐI í krafti kvenna og var einnig lektor við viðskiptadeild. Halla stundaði nám og störf í Bandaríkjunum í 10 ár og starfaði meðal annars hjá M&M/Mars og Pepsi Cola, hún lauk viðskiptafræðiprófi með áherslu á mannauðsstjórnun frá Auburn University í Alabama og MBA prófi í alþjóðlegum viðskiptum frá Thunderbird í Arizona. Halla hefur setið í stjórn fjölmargra fyrirtækja.
Gudbjörg Edda Eggertsdóttir er aðstoðarforstjóri Actavis. Guðbjörg Edda lauk kandídatsprófi í lyfjafræði og var ráðin sem markaðsstjóri Delta hf (nú hluti af Actavis) árið 1983. Hún var aðstoðarforstjóri Delta á árunum 1999-2002, auk þess að sinna sölu til þriðja aðila og hafa umsjón með útflutningi og þróun. Eftir sameiningu Delta og Pharmaco árið 2002 var hún skipuð í framkvæmdastjórn sameinaðs félags og situr nú í framkvæmdastjórn Actavis. Guðbjörg Edda hefur verið virk í starfi Lyfjafræðingafélags Íslands og starfaði m.a. í fjögur ár sem varaformaður félagsins og önnur fjögur ár sem formaður.
Vilhjálmur Þorsteinsson starfar sem fjárfestir, einkum á sviði upplýsingatækni. Hann er stjórnarformaður Verne Holding og situr í stjórnum nokkurra frumkvöðla- og upplýsingatæknifyrirtækja meðal annars CCP, DataMarket, Gogogic og Gogoyoko. Vilhjálmur hefur fengist við hugbúnaðargerð frá árinu 1982 og starfað í hugbúnaðargeiranum bæði í Bretlandi, Hollandi og á Íslandi áður en hann snéri sér að fjárfestingum og stjórnun.
David Adams lauk námi í hagfræði og stærðfræði frá Loughborough University í Englandi árið 1984. David vinnur að því að aðstoða fyrirtæki við að finna eigin lausnir í vörumerkjastjórnun (branding) og viðskiptaþróun (innovation processes). Hann stofnaði sitt eigið fyrirtæki árið 2002 og byggir hugmyndafræði sína á 20 ára reynslu af markaðs- og samskiptamálum m.a. með vörumerkjarisum á borð við Procter & Gamble, Nestlé, Mars og Shell. Í dag sérhæfir David sig í vinnu með leiðandi norrænum fyrirtækjum sem hafa haslað sér völl á alþjóðlegum vettvangi. Meðal samstarfsaðila síðari árin eru Novo Nordisk, Actavis og Coloplast.
Kristín Edwald er hæstaréttarlögmaður og einn af eigendum lögmannsstofunnar LEX. Kristín lauk cand. juris prófi frá lagadeild Háskóla Íslands árið 1997, hún hlaut réttindi sem héraðsdómslögmaður árið 1998 og sem hæstaréttarlögmaður árið 2005. Kristín starfaði við lögfræðistörf og lögmennsku á árunum 1997-2000, við efnahagsbrotadeild ríkislögreglustjóra frá 2000-2002 en hefur starfað á LEX frá árinu 2002. Kristín hefur gegnt ýmsum félags og trúnaðarstörfum, m.a. situr hún í stjórn Ríkisútvarpsins ohf. og stjórn LEX, hefur setið í stjórn LÍN og Barnaverndarnefndar Reykjavíkur. Kristín hefur m.a. sérhæft sig í félagarétti og fjármagnsmarkaðsrétti og er stundakennari við lagadeild HR.
